КАРАКОЛДО ПАЙЫЗСЫЗ ФИНАНСЫЛЫК ЖАРДАМ АРКЫЛУУ БАЛА БАКЧА АЧЫЛАТ.
Каракол шаарынын тургуну, жеке ишкер Гулбарчын Айсахунова 2022-жылы Ысык-Көл облусун өнүктүрүү фондусуна иштеп жаткан бала бакчаны кенейтүү жана өнүктүрүү максатында долбоор жазып кайрылган. Долбоор Фондтун Байкоочу кенеши тарабынан жактырылып 5 млн. сом өлчөмүндө пайызсыз насыя берилген. Бүгүнкү күндө бакчанын имараты кенейтилип, оңдоп-түзөө иштери жүргүзүлүүдө. Учурда бакчада 15 бала тарбияланып, 5 кызматкер иш алып барат. Ал эми кошумча имараттын бүткөрүлүшү менен балдардын саны 50-60 балага чейин жетип, кызматкерлер дагы көбөймөкчү. Ишкердин айтымында, мектепке чейинки билим берүү мекемеси базарга жакын жайгашкандыктан, базарда соода-сатык кылган ата-энелер үчүн аябай ыңгайлуу болмокчу. Ошондой эле, “жаны бала бакчанын ачылышы менен шаардагы бала бакчага болгон муктаждык женилдеп жана бөбөктөрдүн сапаттуу билим алышына шарт түзүлмөкчү” деп баса белгиледи бала бакчанын жетекчиси.
ЫСЫК-КӨЛ ОБЛУСУ БОЮНЧА АЛГАЧКЫ ЖОЛУ ЖЕЛИМДИ КАЙРА ИШТЕТҮҮЧҮ ЗАВОД АК-СУУ РАЙОНУНДА КУРУЛДУ.
Ак-Суу районунда желимди кайра иштетүүчү завод жакынкы күндөрү ишке берилмекчи. Ишкана 2022-жылы жеке ишкер тарабынан курула баштаган. Ишкер долбоор жазып Ысык-Көл облусун өнүктүрүү фондусуна кайрылган. Фондтун Байкоочу кенеши тарабынан долбоор колдоого алынып 20 млн. сом пайызсыз насыя ишкананы курууга болүнгөн. Бүгүнкү күндө заводго керектелүүчү бардык жабдыктар алынып келинди жана сыноодон өткөрүлүүдө. Учурда ишканада 30 адам эмгектенүүдө. Орточо айлык акылары 25 мин сомдон жогору. Кызматкерлер үчүн жатакана, жунуучу жай, ашкана жана башка шарттар каралган. Ишкердин айтымында завод 3 смена менен тынымсыз 24 саат иш алып бармакчы. Суткасына болжол менен 1,5- 2 тонна калдыкты кайра иштетүү пландалууда. Ал эми иштетилген желимдерден пресс жиптери жана мешоктор чыгарылмакчы. Желимдерди атайын унаа менен заводтун кызматкерлери Ак-Суу, Каракол, Түп, Жети-Өгүз райондорунда жайгашкан дүкөндөрдөн жана жашоочулардан сатып алышууда. Ишкердин айтымында ар бир жашоочу ан-сезимдүүлүк менен таштандыны бөлүп жыйноого үйрөнсө жаратылышка гана пайда алып келбестен, кошумча каражат таап алуу мүмкүнчүлүгү жаралмакчы. Ошондой эле, келечекте желимден сырткары башка тиричилик калдыктарын кайра иштетүү пландары бар экендигин кошумчалады. Сыноо мөөнөтү ийгиликтүү аяктаган сон ишкана толук кандуу жумушун баштамакчы.
